Es Klima
Dialekttext rund um Klima und Klimawandel
Es Klima
"Owa wos waratma denn ohne Schifoan, mia kemman jo scho mit de Bredln auf'd Wöd"sogt da Tourismusobmau und haut a poa Mille in'd Schneekanon.
Nächsts Joa kemman a poa Baumasta va Dubai und zang eana wiama a Halle mocht, mit der ma de Streif indoor mocha kau.
Owa i kau jo net mit da U6 ind Hockn foan heast. des is jo muaz umständlich.
Wos dua i denn waunns a wengl trepferlt. Daunn waschlts ma da Anserpania o in de 5 Minuten za da Station.
Und - her auf - de steckan mi jo olle au in da U-bauhn. Corona, Maul-und-Klauen-Seich und woswaßi nu.
Und außerdem mechat i mei Rammstein laut hean und ned mid de Stepsln, de vatrog i net.
Und der Gruch, i bin jo so empfindle, i speib mi au waunn i an Kebap riach in da Friah.
Im Summa geht nix ohne de Klima van SUV, sunst kum i ins Büro wia a nosser Hund.
Iwo, auf mein Land Rover kummts jetzt ober aa ned au! Gschwind wia da Wind: Noch zwa Tschick bin i in da Bude, waun se ned grod wer auf'd Stroß pickt.
Owa brennt hots in Spanien, Jessas, ois wor hi. Na a Waunnsinn, nirgends kaunnst mehr hifliagn im Summa. Des is nimmer so wia friaha. Ober es essn wor guat.
Des min Klima do mochan sa se jo nur narrisch, des is jo immer scho auf und o gonga...